Tenning av julegrana

Dette året tok me brått på oss ansvaret for arrangement rundt tenning av julegrana den 27.11. Kvelden onsdag 23. vart det bestemt, og  formannen jobba hardt torsdagen, men då var og det meste  på plass. Bryne skulekorps, Unge Spor og Fantefølget stod alle klar til å bidra med sitt, og mandariner som smånissane frå Fantefølget kom med i fattigkassen på Gråtassen, vart sponsa av Kiwi.

Vinden som bles gjennom marg og bein på laurdagen hadde stilna, og me fekk eit fantastisk ver under arrangementet med vindstille, opphald og ned mot 0 grader.

Bjørn og Ann Iren hadde med bålplannene sine, og det laga herlig stemning med levande bål medan arrangementet pågjekk.

Foreldra til Bryne skulekorps sine musikantar selde gløgg og nysteikte lappar og kyrkja delte ut kaffi og peppekaker, som som og bidrog til å lage god stemning på torget, som var heilt fullt med folk.

Bryne skulekorps sine små musikantar og Bryne musikkorps sine store spelte i skjønn forening ca ein halv time før lysstenning, til gangen rundt juletreet og til avslutning der ei av Unge Spor sine lovande sangarar song Vi tenner våre lykter.